Tura, Feb 22: Federation of Khasi Jaintia and Garo People (FKJGP), Garo Hills Zone, Tura-ni dilgiparang, da·al Sombaro District Selection Committee (DSC)ni Chairman aro West Garo Hills a·jani Deputy Commissioner (DC) Pa Ram Singh-ko grongaha.
Iani bidingo, FKJGP-GHZ-ni padot Pritam Arengh-ni kobor ra·timgiparangna agan-talatani gita, ia ja February 5 aro 19 tariko Lower Division Assistant (LDA) aro IV Grade postrangna porikkako seatani result-ko parakatani ja·man personal interview ba viva voice-na seokako man·anggiparang General Category-o A·chikrangoni saksakoba napatgija gipin jatrarako napatahani gimin FKJGP-ni dilgiparang DSC-ni Chairman-o sing·doaniko dakangaha.
FKJGP dilgiparangni paraka gitade, Meghalaya Job Reservation Policy-ni gitade general category-ara reservation category ong·ja, iako bang·bata manderangan ma·sisretenga.
General category-o je jatba dongna man·aia, gipin jat ba non-tribalna mangmang a·kange donna man·ja. Chingni ma·siani gitade, ian merit basis-osa ong·genchim aro ia merit basis-o A·chikrangba dongna nanga. Uni gimin chinga da·alo iako raken jegalaniko dakenba DSC-ni Chairman-ko grongaha.
Uko grongani ja·man, iani bidingo nipiltaianiko dake parakatgen ine DSC-ni Chairman chingna ku·chakataha, indiba iako dakani ja·manoba chu·ongnikgijanirang dongkuode mikkangchi chinga rakbate ja·kurangko de·angskagen ine FKJGP-GHZ-ni padot Pritam Arengh agandapataha.
