Tura, Nov 18: Sakgipinni u·i-ma·sianirangko on·grikachi gipinrangko dakchakgrikna man·na gita a·dokoni pilak game-ge·e cha·enggiparangna dingtang dingtang programme-rangko ra·bagipani gimin Knowledge Exchange programko Sukrobar salo, South Garo Hills a·jani skotong Baghmara-ni Multi Facility Centre-o ong·atangaha.

Game cha·enggiparangni namgnina saksa-sakgipinni u·i-ma·sianirangko on·grikani programko ong·ataniara, bang·a project-rango nangchapgipa mongsonggipa kamrangni gimin game-ge·e cha·giparangna ma·siate ba talate on·na gita miksongani ong·a.

Unbakana, gama-ge·ani bidingo saksa-sakgipinni namgipa aro pangkamgipa dakmesokanirangko ja·rikpaatachi aro sakgipinrangnaba ma·siate on·anirangchi bang·a game-ge·e cha·enggiparangni aro bading-chiwalgiparangni chagrongenggipa neng·nikanirangko namatna gita ia programchi dakchakaniko on·na miksonganiba ong·jola.

A·dokni dam 11 district-rangoni songni-nokni manderangko ia programo bak man·chapate gama-ge·anio mongsong dakna nanggipa kamrangni gimin songsa-songgipinna ba saksa-sakgipinna uamangni u·i-ma·sianirangko on·grikachi dakchakgrikaniko on·na gita Megha-LAMP team, ia programko ong·atanggen.

Programo, South Garo Hills a·jani Deputy Commissioner, Dr Rezina Ch Marak, MCS baksana MBMA/MBDA, DPM, Pa Brilliar Ch Sangma, District Soil & Water Conservation officer, District AH&Veterinary officer, Assistant Registral Officer, DCIC-ni General Manager aro gipinrang bakko ra·angtokaha.

Uandake, salni programo, a·jaoni nambatgipa aro kamo chu·sokenggipa IVCS-na tangkani boksiskoba on·angjolaha.