Tura, Dec 09: IFAD-ni MEGHA-LAMP Project baksana, a·dok sorkarini a·bachengatgipa FOCUS program, PRIME Start Up Hub aro World Bank-ni CLLMP Project-rang baksa nangrime dakchakatani ning·o, Knowledge Sharing Event, chong·motan a·jaoni pilak game-ge·e ba bading-chiwale cha·giparangni gisepo uamangni u·i-ma·sianirangko saksa-sakgipinna on·grikani programko Tura, Dakopgre-o donggipa SMELC Building-o Sukrobar salgimikna ong·atangaha.
Ia programko ong·ataniara, gama-ge·ani ba bading-chiwalani bidingo u·i-ma·sigipa manderangni an·tangtang ma·sianirangko gipinrangna on·grikachi sakgipinrangna namgniko on·na ba didianirangko on·na gita miksongani ong·a.
Ia knowledge sharing event-o West GAro Hills a·jani bang·a dingtang dingtang block-rangoni manderang, bading-chiwalaniko a·bachengenggiparang gimikan re·bae bak ra·angtokenba, ong·telaigipa gamrangko nirok-simsakani, chi aro buring-bolgrimko ripingani, bading-chiwalani, cooperative movement, kamrangko ka·chakatani, Producer Group-rangni kamrang, Homestays, bija jilani, ba·ra dokani ba ugitarangni bidingo an·tangtangni ma·sigiminrangko sakgipinrangna agane on·angtokskaaha.
Tom·anio mongsonggipa sokgipa ong·e bakko ra·gipa West Garo Hills a·jani Addl. Deputy Commissioner, Rezia Ch. Sangma, MCS, iandakgipa programchi songni-nokni manderangna dakchakani ong·gipa aro saksa-sakgipinni ma·sianirangko on·grikachi dakchakgrikaniko on·na chol ong·gipa aro manderangna didianiniko on·gnigipa programko ong·atanina, iako ong·atgiparangko dingtangmancha de·mittele aganangaha.
