Tura, April 29: Rongram C&RD block-ni ning·o donggipa Ganol A·pal Fishery gittimo dongenggipa manderangni nok sambao bilakbegipa 33 KV bijoli post-ko songe nokking kosak gita bijoli sillitingko sringangani gimin gittimni manderang badi ka·e Bristibar salo West Garo Hills a·jani Deputy Commissioner (DC) na lekka sedoangaha.
Ganol A·pal Fishery gittimni manderangni aganani gitade, MeECL Department manigija nok sambao bilakgipa bijoli post-ko songdrae Dadenggre Sub-Division-ona sringanggipa silliting ka·mao donggipa nokni manderangna kenbeani ong·engachim. Uni gimin manderangni dongchakenggipa nok joke bijoli post-ko ra·jite songchina biap gipinkoba on·ahachim, indiba manigija songdare donangaha ine matnangataha.
“Mikka-balwa rakani somoio chingna namen kenbeani ong·enga, maina batanggimin 2001 bilsio apsan line-ni silliting chottome mongma mangsa siaha, uni ja·mano bijoli post nokko be·gropdaptaie matchu manggittam siaha aro nokrang nosto ong·atako man·aha. Uni giminsa bijoli post-ko nok sambaoniko ra·jitange songchina aganahachim, indiba MeECL-ni manderang police rimbae songaigen, na·song maidakgen ine ka·mikkenatenba post-ko songdrae donangtaiaha,” ine gittimni manderang aganaha.
MeECL department-ni indake mande nok sambao manigija bijoli post-ko songdraani gimin changni-chang MeECL, Western Zone-ni Chief Engineer-na lekka sedoahachim, indiba da·alona kingkingba post-ko ra·jite songkuja, unbaksana, All Garo Hills Trained Electricians Association (AGHTEA)-ba kenchakaniko nike, MePDCL-ni Chief Engineer-na lekka sedoatahachim, indimangba maming knachakgija namrenge dongaienga ine uamang janapatkuaha.
Indake ong·engon, ia kenbegnigipa obostani bidingo janape mija April 26 tariko WGH a·jani DC-na lekka sedoataha. Gittimni manderang badi ka·e lekka sedoatani bakan DC, iako nirokatchina MeECL-ni Additional Chief Engineer-na lekka sedoatahachim, indiba MeECL department da·onaba maming kamkon a·bachengatkuja ine suk ong·gija gittimni manderang agandapataha.
