Shillong, Mar 17: Garo aro Khasi ku•sikrangko Constitution-ni Eighth Schedule-o ra•gatchina dabiani bidingo a•dokni dilgiparang Bristibar salo, Assembly-ni budget session-o chanchirimaniko dakangtaiaha aro ia chanchirimanio West Shillong-ni MLA Mohendro Rapsang-ba bakko ra•angengon, ia ku•sik minggniko India sorkari, Eighth Schedule-o ra•gatjaengani gimin sing•doangaha.
Garo aro Khasi ku•sikrangko Sixth Schedule-o recognise ka•manaha ong•ode maini gimin Eighth Schedule-o ra•gatna man•jaenga ine Rapsang sing•doangaha.
“Garo aro Khasi ku•sikrangko Sixth Schedule-o recognise ka•manaha ong•ode aro ia ku•sikrangara Autonomous District Council-rangoba official ku•sikrang ong•engode mai niamo pangchake India sorkari, ia ku•sik minggniko Eighth Schedule-o ra•gatna man•skajaenga,” ine Rapsang aganaha.
Iani bidingo District Council Affairs-ni Minister Lahkmen Rymbui aganchakaniko on•angskaengon, ku•sikko jakkalaniara dingtang aro ku•sikko Eighth Schedule-o ra•gataniara dingtang ong•a ine talataniko on•angaha.
Ia ku•sik minggniko Eighth Schedule-o ra•gatchina didie Meghalaya Legislative Assembly-ni gita India sorkarina resolution-ko on•atmanaha aro da•o India sorkarini aganchakanina sengkuenga ineba Rymbui parakataha.
Ia chanchirimanio Siju-Rongara constituency-ni MLA Rakkam Sangma-ba bak ra•angpaengon, badiaba somoirangode ku•tangtangchian Assembly-ni tom•anirangko ong•atchina gita Assembly-ni Speaker-ko didiangaha.
Garo aro Khasi ku•sikrangko Constitution-ni Eighth Schedule-o ra•gatchina didie 2018 bilsion Meghalaya Legislative Assembly-o resolution-ko pass ka•manahachim ine nikna man•a.
