Tura, June 4: Garo Hills-o game ge·e cha·enggipa manderangna dakchakanirangko on·na gita Sonibar salo, bol 10 PRIME Agriculture Response Vehicle-rangko Meghalaya a·dokni Chief Minister Conrad K Sangma, a·bachengate on·angaha.

Ia PRIME Agriculture Response Vehicle-rangko a·bachengate on·na gita dingtangmancha program-ko New Tura-ni Matchakolgre LP School kal·chakramo ong·atangaha aro ia program-ko ong·atanio Chief Minister baksana a·dokni Agriculture & Farmers’ Welfare Minister Ampareen Lyngdoh-ba dongpae bak ra·angaha.

Ia bilsini HSSLC aro SSLC porikkarango teng·sugipa Garo Hills-ni chatro chatrirangnaba ia tom·anio dingtangmancha mande ra·pilskaaniko dakangjolaha.

Ia program-ko ong·atanio PRIME Agriculture Response Vehicle-rangko a·bachengate on·angan baksana Garo Hills-o bol wa·arangko tangatpilna ja·ku de·ani bak gita Garo Hills gimikni dam 297 skulrangna lak 59.4 seed ball-rangko Chief Minister pakwate on·angjolaha.

Meghalaya a·doko bol wa·arangko tangatpilna gita sorkari kamrangko ka·engon, bol wa·arangko ge·na gita a·dok gimiko million 3.6 seed ball-rangko suale on·angna sienga.

Indake ong·engon, ia tom·anio Green Meghalaya Initiative ba Payment for Ecosystem Service (PES) Scheme-ni ning·o namgnirangko man·enggipa manderangna a·dokni Chief Minister, gimik crore 3.2 tangkarangkoba suale on·angaha.

India sorkarini a·bachengatgipa Mission LIFE campaign-ni bak gita ia program-ko ong·atanio a·dokni Chief Minister aro Agricultre Minister-ba bol ge·anio bakko ra·angaha.