Tura, June 13: Garo Hills-ni chadambe saksako North East United Football Academy-ni training-na seokaha aro uan Garo Hills-o North East United Football Academy-ni training-na seokako man•chenggipa ong•aha.
North East United Football Academy-ni training-na seoka man•gipa Chusrang Sangma-ko Sombar salo, Meghalaya a•dokni Chief Minister Conrad K Sangma, Tura-o gital dake taridapgimin auditorium-ko nokdonggae on•angani somoio jinmana parakataha.
West Garo Hills a•jao kal•susaanirangko namdapatna gita sorkarini ja•ku de•anirangko jinmana parakatengon, Tura-o track aro field kal•susaanirangko sokachakna gita stadium-ko rikna gong kror 15 tangkarangko chamataha ine Chief Minister parakataha.
Tura jillako nitobatatna ra•gatgipa project-ni gimin janapatskaengon, dingtang dingtang neng•nikanirangko chagrongna nangengoba ia project-na sorkari gong kror 15-ko chamataha aro street light-rangko tariani kamrangkoba ia 2022 bilsini September ba October jarangoni a•bachenggnok ine Chief Minister parakataha.
