Tura, Dec 27: 2011 bilsini Assam aro Meghalaya-ni IPS Officer, Anand Mishra, jean, Garo Hills-o uni khaki ganani kamko ka•chenganio, East aro South Garo Hills a•jarangni bilakbatsranggipa bobil dol Garo National Liberation Army dolrangko rim•gipa officer, kamtangko watna mangsonganiko parakataha.
Ua da•alo, Assam-ni Lakhimpur a•jani Superintendent of Police ong•e dangdike on•enggipa ong•achim aro 2024 bilsini January jani 17 tarikoni kamtangko watna ine Assam sorkarini Chief Secretary-na chittiko seataha.
Anand Mishra, ia chitti-ko 2023 bilsini December jani 18-o, Assam sorkarina on•ataha. Indake, ia chittio, dingtang dingtang songsalni kamrango jakgitele dangdike on•a gita uni mangsonganiko paraken janape seataha.
Indake, ia bilak wa•sakuenggipa officer, Bihar-ni Parliamentary seat-na susaanio, BJP-ni gitalgipa dil•gipa ong•gen ine uni melibatgipa ripengskarang aganaha.
Ia officer-ni political party-o bakrimgniko u•igenchimoba, adita bilsirangna skang, Garo hills a•jani buring diltugiparango, an•tang sipairangko dilenba GNLA bobil dolrang baksa dakgrikani a•bao cheani gimin, bang•batan u•ikujachim.
Indake, ua IPS Officer ong•e skanggipa, West Garo Hills a•jani Phulbari-o, Goeragre Tura-ni 2nd MLP Battalion baksa nangrime, Sub-Divisional Police Officer ong•enba dangdike on•baaha.
Phulbari-oni, East Garo Hills a•jani District Police-rang baksa, William Nagar-ni Additional SP ong•e kam ka•angaha aro IPS Officer, SP Davis Nestell R Marak-ni ning•o, 2014 bilsioni 2015 bilsiona kamko ka•angaha.
Indake, South Garo Hills a•jao, ua skanggipa changna Superintendent of Police ong•e, kamko ka•angani somoio, GNLA bobil dolrang bilakbee silairangchi goanirangko, mande rim•sruke ra•angani aro rang•gitik chadrapanirangko dakengachim.
Uni South Garo Hills a•jani Baghmara-o ong•engmitingo, GNLA aro police-rang baksa gogrikanirang ong•angaha aro mongsongbate ganna chinanirangkoba champenganikoba dakangaha.
Bonkamao, ua Garo Hills a•ja aro Meghalaya a•doko watenba, Assam-ni Dhubri aro Nagaon-ni SP ong•e kamko ka•angskaaha.
Iakoba poraie nina man·gen: Git ring•anio mingsingbegipa Sanam Puri, Nagaland-oni Zuchoben Tungoe baksa bia ka•nasia
Watch
