Tura, April 17: Mijal Sukrobar walo mikka-balwa ta·rakangani a·sel bang·a nok-jamrang nosto ong·atako man·an baksa bijoli silitingrang dingtang dingtang songrang aro gittimrango bolrang be·dape nosto ong·tokaha.
Ta·rakbegipa mikka-balwachi Tura-ni dingtang dingtang biaprango nosto ong·ata man·gipa gittimranga — Bolsal A·ding, Nikwatgre, Ranggira gittim, Kombe gittim aro Gongadamal ong·a. Unbaksana Rongram Block-ni ning·o ga·akgipa songrangara —Bokmagre, Waram Songma, Aguragre, Wadrogre, Jendragre, Lower Danagre, Megapgre, Uregre, Soragre aro Botegre ong·achim.
Ia ong·anga obostani gimin West Garo Hills a·jani Deputy Commissioner (DC) Pa Ram Singh-ni u·iatani gita, balwa-mikka rakdape nosto ong·atako man·gipa nokdangrangna dakchakanirangko on·gen ine parakataha.
Sukrobar walo inditan mikka jimbee waan baksa balwa ta·rakangani a·sel bang·a rama-soroksamni dal·dalgipa bolrang be·dapaha aro bijoli silitingrang chottome sorokrango ga·ake dongtokahachim. Indake ong·engon, rama-sorokrango be·dapgipa bolrangko aro bijolini silitingrangko SDRF dolrang, MeECL, PWD department-ni manderang aro gittimni manderang nangrime ta·raken tarienba rama re·na jokgijarangko pringnin rongtalataha.
Indake mikka-balwa rakdapanio duko ga·akenggipa nokdangrangna dakchakaniko on·pachina gita gittimni manderangko aro dingtang dingtang organisation-rangko a·jani DC Pa Ram Singh didiangaha.
Walni somoio mikka-balwa rakdapanichi Ranggira gittimni mande saksa adita saknaako man·aha aro uko da·o Tura Civil Hospital-o done sana¬-bananiko on·enga ineba DC u·iatjolaha.
