Tura, May 24: Sorkarichi chalaienggipa BSNL mobile company-ni namjabeani a·sel hajal ritcha BSNL-ko jakkalgiparang neng·nikaniko man·a nangengaha.

Batanggimin antio konta 72-na simsakgijani a·sel service-ko bon ka·atanichi neng·nikatan baksa May 23 tarikoba attam 3 bajioni a·bachenge konta 19-mangna service dongtaijaha.

Iani a·selko sandie nion, Jengal aro Bajengdoba jolo nosto ong·gipa biapona re·bana gari namjaani a·sel somoi gita sokbana man·jaaha aro Garo Hills jolko BSNL-na tekka ra·giparangba apsankon donchipani a·selo namjabatroroenga ine nikna man·aha.

BSNL-ni service namjaenganiara ian skanggipa chang ong·ja aro kakketko aganode namchipakon nikjaenga ine BSNL-ko jakkalgiparang ka·onange, neng·nikaniko namatna kam ka·e on·china dabiangaha.