Tura, May 24: South Garo Hills a·jani song damsao, COVID-19-na porikka ra·e nina jechakgipa mande saksa Sombar salo siangaha.
Koborko on·ani gitade, Sombar salo sianggipa mandeara Nongalbibra hospital-ni ning·o donggipa Rongsa Awe-ni Mengkulgittim songoni bilsi 40 ong·gipa mande ong·achim.
“Re·anggipa antio ia songo COVID man·gipa dongahani gimin ia songko containment zone dakate songni manderangko COVID-na porikka ra·e niengmiting somoio ia mande an·tangko porikka ra·e nina jechakaha indiba da·alo ia mande siangaha aro uni manggisiko porikka ra·e nion positive ong·aha,” ine South Garo Hills a·jani doctor-rang parakataha.
COVID-19-na dongimin niamrango pangchake ia mandeni manggisiko gopna ra·angna gita magistrate aro police-rangko ua songona okamatna nangaha ineba kobor on·timgiparang u·iataha.
Sombar salo sianggipa ia mandeko channe da·o South Garo Hills a·jao COVID man·e sianggiparang gimik sak 4 gapengaha aro ia apsan salon South Garo Hills a·jao sak 17 manderang COVID man·dapaha.
