Shillong, Nov 20: Re·baenggipa 2023 bilsini Assembly election-o National People’s Party (NPP), Garo Hills-o seat dambonga damdokmangkosan chena man·aigen aro iako NPP-ni survey ka·anion ma·sina man·aha ine Opposition dolni dilgipa Mukul Sangma-ni agananiko NPP-ni state president Dr WR Kharlukhi jegalataha.
“Ia survey-ko NPP ka·aha ine ua (Mukul) aganenga ong·ode ua an·tangba NPP-ni membor-sa ong·enga aro TMC-ni membor ong·ja. Ong·jaode ua maikai chingni survey ka·aniko ma·siaha?” ine Dr Kharlukhi sing·doataha.
Dr Kharlukhi-ni parakatani gitade, 2018 bilsio Congress dol, dam 20 seat-rangko cheahachim indiba ja·mano uamangoni bang·batan All India Trinamool Congress (AITC)-ona katskaahani gimin da·o Garo Hills-o manderangni ka·dongchakaniko man·janaba dongaha.
“Da·o uamangko Garo Hills-ni manderang dake nina siengkua. Ua (Mukul) an·tangkoba name hisape nichina ong·jaode ua an·tangni seat-koba gimaatrangnaba gnang,” ine Dr Kharlukhi aganaha.
Congress dolko wate katna man·aia ong·ode uamang bilona re·baani ja·man TMC-koba wate katainaba gnang ineba NPP-ni state president parakataha.
Basin development-ni gimin sing·on, ia scheme-ko Congress a·bachengataha indiba Tura-oni Shillong-ona dakanggipa ramakode PA Sangma-sa a·bachengatahachim indiba ia ramako Mukul an·tangsa bilona re·baani ja·man a·kangskaaha ine Dr Kharlukhi parakataha.
Gipin dolni MLA-rang baksa songgigrikani dongani giminsa Mairang aro South Shillong constituency-rango NPP-ni candidate-rangko susaatjaengama ine sing·aniko jegalatengon, da·o dipet election-na jagni somoirang dongkuenga aro ia constituency damgnio susaani giminba uamang chanchikugen ine NPP-ni state president parakataha.
Da·o dipet Mairang constituency-o UDP-ni president aro Assembly-ni Speaker Metbah Lyngdoh aro South Shillong-o BJP-ni Cabinet Minister Sanbor Shullai MLA ong·engachim ine nikna man·a.
