Tura, May 17: Mongolbar salo, Meghalaya a•dokni Chief Minister Conrad K Sangma, South Korea-ni India-na Ambassador Chang Jae-Bok baksa, Tura-o Refused Derived Fuel Plant pilot project-ko oprake on•angaha.
Ia project-ara India a•songo skanggipa changna ra•gatgipa project ong•enga aro ia karkanako Tura-ni Rongkhon Songgital-o jabol galchakram biapo Meghalaya sorkari, Tura Municipal Board aro South Korea a•songni Chamhana GK kulie on•aha.
Ia karkanako Tura aro wilwilao donggipa manderangni salanti galenggipa jabolrangoniko koela gita dake wa•al so•anio jakkalgipa am•bolrangko tariskana miksongani gnang kuliaha.
Ia project-ko a•bachengate on•angani somoio a•dokni Chief Minister, jinmana aganprakangengon, jabolrangko manderang wa•al so•anirango jakkalna man•na gita miksonge tariengani gimin ian manderangni ma•siani aro chanchianirangko dingtangatgnok ine parakangaha.
“Ia jabol galchakram biapko anga re•bae nieon, ia biapo anga maikoba dakna skani ong•kataha indiba anga maiko aro maikai dakgen uko ma•sikujaengachim. Indake ong•genchimoba, ia biapo jabol galani bewalko an•ching dingtangate, ia biapko tangsekgilgil ong•attaina nangenga aro mongsongbate an•chingni galenggipa jabolrangko an•chingni dingtang dingtang kamrango jakkalskana man•na gita kolko sandina nangenga ine anga ma•siengachim,” ine Sangma aganaha.
Ia project-ni gimin talataniko on•angengon, ia project-ko 2019 bilsion a•bachengatna gita chanchiani ong•katahachim indiba sajinmani a•sel donkuna gita nangaha ine Chief Minister parakataha.
Ia karkanao jakkalpilna man•gipa jabolrang, jekai sil, glass, bol aro uandakgipa bosturangna agrede pilak jabolrangkon, wa•al so•ani bostu dake tarigen aro iakon manderang, koela aro wal•kirangni pal jakkalnaba man•gnok.
Ia project chu•sokgipa ong•genchimode apsan dakgipa karkanarangko a•dokni gipin biaprangoba kuligen ineba Chief Minister parakataha.
Ia project-ko a•bachengate on•anganio South Korea-ni Ambassador Chang Jae Bok-ba jinmana aganprakengon, ia project-ara pilaknan namgni ong•gen aro ia project-ko a•bachengatanichi Korea aro India a•songni gisepo mikkangchi manderangni janggi tanganio dingtanganiko ra•bana technology-ni kamrangko apsan ka•rimna man•gen ine parakataha.
Iandakgipa project-rangko ra•gatangkuna aro apsan nangrime kamrangko ka•angkuna gita New Delhi-o donggipa Republic of Korea-ni Embassy krenge kamrangko ka•angkugen ineba ua ku•rachakaniko on•angaha.
