Tura, May 21: Sukrobar salo Meghalaya a•dokni Chief Minister Conrad K Sangma, South West Garo Hills a•jani Damalgre jolo donggipa Balalgre songo rikenggipa Captain Williamson Sangma Technical University aro College of Architecture & Urban Planning-ko nieaha.
Ia biapko nieani somoio a•dokni Chief Minister baksana Tura-ni Lok Sabha MP Agatha K Sangma aro North Tura-ni MLA Thomas A Sangma-ba dongpaaha.
Ia nokrangko rikani bidingo Education department aro RUSA-ni official-rang, a•dokni Chief Minister-na talate on•angengon, kamrang da•o 80 percent-ni gitade matchotmanaha aro ia building ge•gnikon ia bilsini October jaode matchotgenok ine parakataha.
Re•baenggipa 2022 bilsio Meghalaya a•dokni bilsi 50 gapaniko manina siengani gimin ia nokrangko 2022 bilsini January 21 tariko nokdonggae on•jolna man•na gita kamrangko somoi gita matchotatchina a•dokni Chief Minister, department-ni official-rangko ge•etangaha.
Garo Hills-o rikenggipa ia institute ge•gniko matchotahaode ian chubata gadangrango poraina nangenggipa a•dokni chatro chatrirangnasan ong•aigija salgro salaram jol gimiknan namgni ong•gnok.
Ia Captain Williamson Sangma University-ko gong kror 16.96 korosrangchi rikengachim.
