Tura, Jan 4: India a•song gimikon bilsi 15-oni bilsi 18 ong•gipa chadamberangko Sombar sal dipet COVID-19-ni tikako su•na a•bachengatahani gimin Garo Hills-oba pilak biaprangon tikarangko su•e on•na a•bachengengaha.
Union Health Ministry-oni u•iatani gitade, bilsi 15-oni bilsi 18 ong•gipa chadamberangko tika su•anio 2007 bilsini January 1 tarikna skang atchigipa chadamberang tikako su•e ra•na man•enga aro ia chadamberangna Bharat Biotech-ni tarigipa ‘Covaxin’ tikako su•enga.
Bilsi 15-oni bilsi 18 ong•gipa chadamberang tikarangko su•e ra•na gita Co-WIN portal-o biming segate ba tika su•chakgipa centre-rangona re•ange biming segateba su•e ra•na man•aigen.
Bilsi 15-oni bilsi 18 ong•gipa chadamberangko January 3 tarik dipet tikarangko su•na a•bachengatahaon ja•delgimin aro bilgrigipa manderangnade tikani gittamgipa pongko January 10 tarik dipet su•na a•bachengskagnok ineba Health Ministry-oni u•iataniko on•angaha.
Mongolbar salo, Hub News-ni gita Tura-ni Matchakokgre-o tika su•e on•enggipa biapko nina re•angon, ua biapo bang•bea chadamberangni tika su•na re•baaniko nikna man•aha.
