Shillong, March 16: April jao ong•atna sienggipa Garo Hills Autonomous District Council (GHADC) election-na BJP dolni ming 17 program-rangko Mongolbar salo jinmana oprake on•angaha.
BJP dolni manifesto ba program-ko BJP-ni state president Ernest Mawrie oprake on•angaha aro ia program-ko oprake on•angani somoio BJP dolni gipin dilgiparang, chong•motan Dipayan Chakraborty, David Kharsati, Sing Mulieh aro BJP-ni state mahila president Judy Surong-ba dongpaaha.
Ia program-ko oprake on•angani ja•mano BJP-ni state president Ernest Mawrie, kobor ra•timgiparangna aganprakatengon, GHADC-na bilrangko on•dapna gita BJP dol, ia GHADC-ko Territorial Council-ona ra•dona jotton ka•gen aro Constitution-ni Sixth Schedule-ko taridapanichi Council-o department-rangko bang•batatna aro ma•mong sorkarioniko joljol tangka paisarangko man•bae on•na kam ka•gen ine parakataha.
GHADC-na dingtang niamrangko BJP tarigen ine janapatengon, GHADC-o non-schedule area-rangko bon•atgen aro scheduled area-rangko songdongenggipa manderangko chel•chakna aro bilakatna gita an•tangtangan sason ka•e janggi tangna man•na gita songni nokni nokma-sordarrangna bilko on•dapgen ine BJP-ni state president parakataha.
Da•o dipet GHADC-o Assembly constituency-ni electoral roll-rangkosa election-rango jakkalengani gimin BJP dol, GHADC-na dingtang electoral roll-rangkoba a•bachengatgen ineba Mawrie parakataha.
Indake ong•engon, BJP dolni mongsonggipa gipin program ba miksonganiranga songsalni namroro silroroanina kamko ka•anio me•chikrangko bak ra•atani, NGO-rangni dabienggipa Garo Customary Law (GCL)-ko nipilani, Garo Hills-o lekka porako namdapatani, syllabus-o Sixth Schedule-ko man•chapatani, Garo Hills-o man•gipa ma•manti bosturangni karkanarangko kulie on•ani, Sixth Schedule a•jao sorkarini kajinarangko komiatani aro uandakgipa program-rangan ong•enga ine BJP-ni state president parakataha.
