Tura, March 23: Re•baenggipa April-ni 12 tariko ong•atenggipa Garo Hills Autonomous District Council (GHADC) election-na National People’s Party (NPP)-ni campaign ka•aniko Mongolbar salo, North Garo Hills a•jao donggipa A•dokgre songoni a•bachengataha.
Lok Sabha-ni gitcham Speaker Purno A Sangma sagi an•tangan, uni election-na campaign ka•anirangko A•dokgre songoni a•bachengatronge chegipa ong•rongahani gimin A•dokgre songko ‘Chenanggre’ ine mingangaha aro uandaken uni depante aro a•dokni Chief Minister Conrad Sangma-ba ia GHADC election-na campaign ka•aniko Mongolbar salo Chenanggre songoni a•bachengataha.
Keeping the tradition alive, I began the election campaign for #GHADC from Adokgre in #NorthGaroHills like my Father, (L) P A Sangma used to. As we honour him, we recommit ourselves to serving our people. Vote for Sh Edbirth D Shira, NPP candidate in the upcoming GHADC elections. pic.twitter.com/2O9KXV3HRj
— Conrad Sangma (@SangmaConrad) March 23, 2021
GHADC election-o Kharkutta GDC constituency-oni NPP-ni candidate ong•e susaenggipa Edbirth D Shira-na chakpae, A•dokgre songo manderangna aganprakangengon, a•doko songdongenggipa manderangna NPP dol on•kange kamrangko ka•enga ine a•dokni Chief Minister aro NPP-ni national president parakangaha.
Uni pagipa PA Sangma sagi, Garo Hills-na aro Meghalaya a•dokna nikjumanganirang dongachim ine janapatengon, uni jumangrangko chu•sokatna gita NPP dol kamrangko ka•skaenga ine Conrad parakataha.
Meghalaya a•dokni district council-rango dingtanganiko ra•bana NPP kam ka•enga aro mikkangchiba ka•angkugen ineba Chief Minister aganaha.
Congress dolni Executive Committee-ko rikengmiting somoio maming dingtanganirangko ra•bana man•jahani a•selsa da•alo GHADC-o pilak kamrangon neng•nikanirangko chagrongna nangengaha ineba Sangma aganaha.
Chief Minister-ni parakatani gitade, Meghalaya a•doko namroro silroroaniko ra•bana nangchongmotenga ine nikenba NPP dol kang•kare kaaha aro da•o manderangni namgnina an•tangtangko on•kange kamko ka•enga.
GHADC election-o NPP-ko seokchina gita manderangko didiangengon, district council-na NPP pilak nanga dakchakanirangko on•aha aro da•o tangka paisani gita neng•nikanirangko chagrongna nangengoba NPP-chi dilenggipa MDA sorkari, GHADC-ni man•na nanggipa kajinarangko skangan on•sorongenga ine Chief Minister parakataha.
District council-rango tangka paisani gita bilake ja•kutango chadengna man•na gita NPP dol, dingtang dingtang cholrangchi district council-ko bilakatna kam ka•enga ineba NPP-ni national president aganaha.
Ia tom•bimonganio Kharkutta-ni MLA Rupert Momin-ba jinmana aganprakangengon, A•dokgre songni gimin aro PA Sangma sagini A•dokgre-o songdongenggipa manderangna ka•saani gimin aganangaha.
Ia tom•anio 26-Kharkutta GDC constituency-ni NPP candidate Edbirth D Shira-ba NPP-ko seokchina gita jolo songdongenggipa manderangko didiangengon, Conrad K Sangma-ni dilanio namroro silroroaniko ra•bana gita NPP dolni kam ka•anirangko agan-talate on•angaha.
Alphonse Sangma-ni GHADC-o chief executive membor ong•engmiting somoio Congress dol, nangana bate kam ka•giparangko rakkiahani a•selsa da•o GHADC-o kam ka•enggiparangna dormaharangko on•na man•jaenga aro tangka paisani gita neng•nikanirangko chagrongna nangenga ineba Shira parakataha.
GHADC-ko nambatatna aro kamrangko nambate ka•angna man•na gita NPP-ko seokchinaba ua manderangko didiangaha.
