Tura, Feb 14: Sombar salo, Garo Hills-ni dingtang dingtang NGO-rang, Garo Hills Autonomous District Council (GHADC) office-ona napdraangenba, gital chief executive membor (CEM) Rakesh Sangma-ko ta•raken ra•galpiljagenchimode antigimik jingjengatanirangko dakna ka•mikkenataniko on•angaha.GHADC office-ko chadrapeani ja•man kobor ra•timgipa manderangna talataniko on•angengon, da•alo uamang Garo Hills gimikni manderang baksa skanggipa changna jingjengataniko dakaha aro gital CEM-ko ra•galchina dabianiko chu•sokatkujagenchimode Sukrobar salona kingkingan jingjengatanirangko dakangkugen ine FKJGP Garo Hills Zone-ni president Pritam Marak parakataha.

Gital CEM-ko jegalna gita Sombar salo Garo Hills gimikonin dingtang dingtang dolrang, Tura-ona tom•chimongbatokaha aro uandaken GHADC office-o napna on•jagenchimoba ritchani ritcha manderang, ka•a ding•chaoe, GHADC office-ona napdraangaha aro gital CEM-ko ra•galpilchina jinma chrik a•bokanirangko dakangaha.

Ritcha ritcha manderangni GHADC office-ona napdraangon, GHADC-o kam ka•enggipa manderang kenjagokenba kamtangtangoni katbildangtokskaaha.

GHADC office-ni gate-rango niroksoenggipa police aro magistrate-rangba manderangni jinma napdraangon, mamingkoba dakna man•jae nie dongtokna nangaiaha.

GHADC-ni gital CEM Rakesh Sangma-ko uamang, gipin jatni an•chi brinani gimin ong•ja indiba janggi tanga gimikan ua A•chikrangni bewalko ja•rikgipa mande ong•jani giminsa jegalenga ineba NGO-rang talataniko on•angaha.

“GHADC-ni gital CEM Rakesh, chonaonin A•chik jatni bewalo janggi tangbagipa mande ong•jani giminsa chinga uni CEM ong•aniko raken jegalenga. Ua A•chikrangni janggi tangani bewal aro daka rikako ja•rikgipa mandean ong•jagenchimode maikai CEM-ni biapko ra•e A•chik jatko aro a•songko dilna man•gen?” ine FKJGP GHZ-ni president sing•doangaha.

GHADC office-ko chadrapena skang, Garo Hills gimikonin dingtang dingtang dolrang, Tura-ni Te•teng A•jao jinma tom•chimongchengaha aro ua biapo jinma tom•bimongani ja•manosa jinma re•jomange GHADC office-o napdraeaha.