Tura, Mar 4: Sukrobar salo Garo Hills Autonomous District Council (GHADC)-ni gital chairman-ko seokanion, opposition All India Trinamool Congress (AITC)-ni membor-rangoni saksa NPP-ni candidate-na pu•one cheatani ja•manoba, GHADC-ni gital chief executive membor (CEM)-ko seokna gita election-ko March-ni 5 tarik Sonibar salo ong•atangkuna sienga.

NPP dolni gita gital CEM-ni kamna Siju-ni NPP MDC Albinush R Marak-ko minge donsomanahaon, opposition AITC-ni candidate aro gitcham executive membor, Dhormonath Ch Sangma-ba, CEM-ni kamna susana gita an•tangni nomination-ko file ka•angskaaha.

Opposition candidate ong•e CEM-ni kamna susaenggipa Dhormonath Ch Sangma-ra, Naguapara GDC constituency-ni MDC ong•achim aro Benedic Marak-ni CEM ong•engmiting somoio uaba NPP-chi dilanggipa Executive Committee-o executive membor ong•ahachim.

NPP dolni gita CEM-ni kamna minge donako man•enggipa Siju MDC Albinush Marak-ara GHADC-ni gitcham deputy Chairman ong•e kamko ka•skaahachim.