Tura, Mar 4: Sukrobar salo, Garo Hills Autonomous District Council (GHADC)-ni special session-ko ong•atangenba, gital Chairman-ko seokna gita election-ko ong•atangaha aro ia election-o Gasuapara-ni National People’s Party (NPP) MDC Sengchim N Sangma, 18 vote-rangko man•e GHADC-ni gital Chairman-na seokako man•aha.
Chairman-na election-ko ong•atanio opposition All India Trinamool Congress (AITC)-ni membor aro Rongrong GDC constituency-ni MDC Rinaldo K Sangma-ba susaangahachim indiba opposition AITC baksa bakrimenggipa membor-rangoni saksade una pu•ongija NPP-ni candidate-nasa pu•onskaaha aro ua 12 vote-rangkosan man•rikaiaha.
Ia cheanichi Gasuapara-ni NPP MDC Sengchim N Sangma, GHADC-ni sak 25-gipa Chairman-na seokako man•aha.
Ia special session-ko West Garo Hills a•jani Deputy Commissioner Ram Singh dilangaha aro gital Chairman-ko seokanio GHADC-ni gimik sak 30 MDC-rangan bakko ra•angaha.
GHADC-o NPP-ni nominate ka•ako man•gipa Aldo A Sangma baksana Opposition dolni MDC saksaba NPP-ni candidate-na seokahani gimin gital Chairman Sengchim Sangma, 18 vote-rangko man•e altuen chena gita man•aiaha.
Ia cheani ja•mano, GHADC-ni gital Chairman Sengchim Sangma, BJP-ni MDC Promod Koch aro UDP-ni MDC Ashahel D Shira-ko man•chape NPP-ni membor-rang baksa, Lok Sabha-ni gitcham Speaker Purno A Sangma sagini gopramona re•ange mande ra•pilskaaniko dakangaha. Ia salara PA Sangma sagini changdokgipa siani sal ong•ani gimin ia salo dingtangmancha MDC-rang una mande ra•pilskaaniko dakangaha.
