BJP MDC aro CM-ni ma·drangoni sakgnian gital Executive Committee-o bak man·anga
Tura, May 3: NPP dolchi bakrime rikdilenggipa Garo Hills Democratic Coalition (GHDC)-ni sak-chikking executive memborrangko Meghalaya a·dokni Governor Pa Satya Pal Malik, Sombar salo ra·chakange Garo Hills Autonomous District Council (GHADC)-o NPP MDC Pa Benedic R Marak-ni dilenggipa gital Executive Committee (EC)-ko bon·kame songangaha.
Biming dongpagiparangoni niksenggiparangara – Garo National Council (GNC)ni MDC aro dakchakgipa CEM Te Nikman Ch. Marak aro Meghalaya-ni skotong minister Pa Conrad K Sangma-ni jongsari sakgni Jengjal-ni gital MDC Pa Grahambell A. Sangma aro Asanang-ni gital MDC Pa Anseng A. Sangma-maangan ong·a.
Ia gital EC-ko rikanio jak on·pana jechakgipa Meghalaya-ni BJP padot Pa Ernest Mawrie aro Tura-ni BJP MDC Pa Bernard Marak-maang sakgni dongoba, Dalu-o seokako man·gipa sakgipin BJP MDC Pa Promod S Koch-ko Executive Member-na seokangskaaha.
Dolni dilgiparangni ku·patttianirang gnang ine agane, Pa Mawrie aro Pa Bernard Marak-maangni ge·etanirangko manigija Pa Koch, NPP baksa bakrime rikna jak snileaha. Indake ong·engon, gital seokako man·gipa dolni MDC-rangko grongna gita BJP dolni mongsonggipa dilgipa aro Meghalaya-ni Health Minister Pa A L Hek baksana National Vice President aro Meghalaya BJP dolko nirokna kamko jako ra·enggipa Pa M Chuba Ao-maangni Tura songjinmaona wenbaani somoio BJP dol maming dakeba Congress dol baksa bakrimna man·jawa ine dingtangmancha ma·eke aganangahachim.
Rochonpara-ni jakgitelo susagipa gital MDC Pa Arbinstone B. Marak, jean NPP dolni MDC aro CEM gitcham Pa Dipul Marak-ko jagokmanpile amataha, unaba gital EC-o portfolio-ko on·aha. Apsandake, NPP-ni Sengbat R. Marak, jean GNC-ni bilake susarimgipa aro dakchakgipa CEM gitcham Pa Augustine R. Marak-ko South Garo Hills, Chokpot-ni Silkigre constituency-o susae amatahachim uaba gital EC-o bakko man·angpaaha.
Saksa a·gipi MDC Pa Dormonath Ch Sangma, jean Tikrikilla, Naguapara constituency-o susaange seat-tangko man·piltaiaha, unbaksa Rongjeng-ni NPP MDC Pa Henen R. Sangma, Bajengdoba, Bolsong-ni gital NPP MDC Pa Crozier G Momin, aro Jakgitelo susagipa Pa Nathawal S Marak, jean doloni bilsi chonbatgipaba ong·a aro jean MDC ong·anggipa Pa Sengnal N. Sangma-ko Baghmara, Wagesik-o susae amatgipa ong·a, iamang gimikkon gital EC-o rimnapaha.
GHADC-ni gital Executive Memberrangni bimingrang — CEM-na Pa Benedic R Marak (NPP), Deputy CEM-na Te Nikman Ch Marak (GNC). Executive Memborrangara — Pa Nathawal S Marak (Ind), Pa Promod S Koch (BJP), Pa Dormonath Ch Sangma (NPP), Pa Arbinstone B Marak (Ind), Pa Crozier G Momin (NPP), Pa Henen R Sangma (NPP), Pa Anseng A Sangma (NPP), Pa Sengbath R Marak (NPP), Pa Grahambell A Sangma (NPP).
