34.1 C
Tura

GHADC-o kam ka·enggiparang jagnini dormahako ra·na ku·rachaka

Must read

Re·baenggipa January-o GHADC-ni Administrator-ko grongna tik ka·a

Tura, Dec 22: Garo Hills Autonomous District Council (GHADC)-o kam ka·enggipa manderang ja 29-na kingking dormaharangko man·gija dongengani gimin re·anggipa December 14 tarikoni December 21 tarikona kamrangko ka·gija jingjengatanirangko dake dongengani gimin December 22 tariko GHADC-ni Secretary, NGEA-ni dilgiparang aro gipin kam ka·enggiparangko an·tangni office room-ona okamate chanchirimaniko dakenba GHADC-o tangka paisarangna kangal ong·aniko agan talate on·anga baksana GHADC-ko mikkangchi namdapatna gita ku·monge kamtangtangko ka·angpiltaichina ua didiangaha.GHADC-o tangka paisarang dongsrangjani gimin gital pay revise-ko on·na man·chongmotjaha,uni gimin na·simang chakchike gitcham Pay Scale-o on·enggipa jagnini dormahako ra·china gitaba ua didiangaha, anga na·simangni duk aro neng·nikaniko ma·sichaka,uni gimin na·simangni dabia gita na·simangna dormahako on·na jotton ka·oba jagni mangmangni dormahakosan jenten on·na gita man·aiaha ine GHADC-ni Secretary,NGEA-ni dilgiparang aro kam ka·enggiparangko mol·mole aganaha.

“Anga saksande na·simangni dabienggipa gital Pay Revise-ko on·na bil dongja, GHADC-ni Administrator-sa ia gital pay revise-ko on·na bil donga. Uni gimin na·simangni dabina nangako mikkangchi dabiangkuaibo, anga na·simangni dabiako beng·ja, indiba na·simang Administrator-ko grongbo aro unbaksa agangrike jekoba kam ka·bo ua January-ni 15 tariko re·baenga. Anga na·simangni dabianiko champengja, na·simang an·tangtangni man·gninasa dabienga.Na·simang da·alo ia jagnini dormahako ra·jagenchimode, na·simangni dedrang Krismas aro Bilsi Gital salo maiko cha·gen, na·simang da·o tangka paisa gri inditan neng·nikaniko man·enga, uni gimin ia jagnini dormaha ong·oba ra·bo na·simangna dakchakani ong·gen aro na·simang ia dal·begipa Krismas aro Bilsi Gital-ni somoio cha·a ringa gri dongna sikengama, na·simang ia jagnini dormahako ra·jaode, na·simang ja·mano sikkimgen, angaba na·simangna jagnini dormahakode on·na sikjachim, indiba GHADC-o tangka paisarang dongjani a·sel na·simangna jagninikosan on·na man·aiaha” ine GHADC-ni Secretary Ma Rikse R.Marak NGEA-ni dilgiparang aro kam ka·enggiparangna agan talate on·angaha.

Uni gisepon NGEA-ni dilgiparang aro kam ka·enggiparang Secretary baksa chanchirimani ja·mano, NGEA-ni dilgiparang uamangni Secretary baksa chanchirimaniko jinmana agan talate on·angskaha. “An·ching gitcham pay scale-o on·enggipa jagnini dormahako ra·ama ra·tokjawa ine sing·ahaon kam ka·enggiparang gimikan ra·gen ine ku·chaktokaha. An·chingde maming chol dongjaha, uni gimin ra·na nangao ga·akaijok, maina bang·bata kam ka·enggiparangan mijalonin phone ka·e sing·atgiparang donga aro bang·bata kam ka·enggiparangan parakgija ia jagnini dormahako ra·na gita bill tarigiparango soi ka·mantokaha, indake mitam ra·a, mitam ra·ja dakode namgni dongjaha, uni gimin anga na·simangko mol·molna sika an·ching gimikan ia jagnini dormahako gitcham pay scale-o on·genchimoba ra·toksrangaibo, indiba NGEA dilgiparangan jagnini dormahako ra·china ge·eta ine matnangpanabe, ra·ode ra·a jinma apsan ra·srangna, Secretary-ba an·chingko ra·china mol·molataha” ine NGEA-ni General Secretary Pa Brithen M.Sangma jinmana aganaha.

“An·ching da·alo ia gitcham pay scale-o on·enggipa jagnini dormahako ra·ahani gimin dabianide bon·aijok ine chanchinabe, an·ching gital pay revise-ko man·na gita mikkangchi dabiangkugen aro on·naba nanggen. Uni gimin an·chingni dabianiko dontongkujawa re·baenggipa January jao dabianiko dakangtaigen aro January 15 tariko Administrator re·baenga uko gronge ia gital pay revise-ni gimin agangrikgen, uni ja·mano an·chingna maiko aganchaka, an·ching jinma uani bidingo meeting ka·e ja·ku de·aniko dakangtaigen” ineba NGEA dilgipa jinmana aganprakataha.

Uni gimin bill tarina nanggipa officer-rang aro staff-rang chokkitangtangona re·ange bill-rangko ta·rake tariatpachina NGEA dilgipa mol·molataha,maina somoi dongjajok, jegitaba Budbar salo ia jagnini dormahako bang·pajaoba man·na nanggen ine NGEA dilgipa officer-rang aro staff-rangko didiataha.

More articles

LEAVE A REPLY

Please enter your comment!
Please enter your name here

Latest article