Tura, March 19: Garo Hills Autonomous District Council (GHADC)-o kam ka·enggipa Non-Gazetted Employee Association (NGEA) ni dilachi ru·uta salrangoni jingjengataniko dake uamangni man·gnigipa dormaha-rangko on·china dabiahaoba sorkarini knachakjahani gimin uamangni manchisoa gita Sukrobar salo, Shillong-ni Malki kal·chakram biapo pring 10 bajioni attam 4 bajiona asonge jingjengataniko dakangskaaha.

Chu·gimik ja 31-rangni dormaharangko on·chipkujani gimin a·dok sorkarini kosako jegale re·anggipa February jani 19 tarik dipet GHADC-o kam ka·enggiparang kamtangtangko ka·gija jingjengatanirangko daktokenga.

Uamangni dabianirangna aganchakchina gita NGEA, a·dokni skotong minister Pa Conrad Sangma-na re·anggipa March 12 tarikoni 16 tarik Mongolbar salona somoiko on·e sengahachim, indiba maming aganchakaniko man·jahani gimin GHADC-o kam ka·enggipa gimik sak 80 mangni gita Shillong-china doange jinma asonge jingjengataniko dakangaha.

Indake ong·engon, GHADC-o neng·skime bilsi-gni batpile dormaha gri kam ka·enggipa Non-Gazetted Employee-rangni Tura-oni Shillong songjinmaona re·ange jingjengataniko dakanio maming a·sel ong·a gri namen tom·tome matchotaha ine NGEA-ni padot Pa Senora Jhony Arengh, koborna parakataha.