Tura, May 4: Bilsi-gittamrangna kingking tangka-paisarangni gita bang·en neng·nikanirangko chagrongna gita nangahani gimin, Garo Hills Autonomous District Council (GHADC)ko mikkangchi kim·kime chalaiangna man·na gita chol donga kakket uni sorkari dakchakaniko on·anggen ine Meghalaya a·dokni skotong minister Pa Conrad K Sangma, ka·dongataniko on·aha.
Neng·nikenggipa obostarangni bidingo skotong minister, GHADC-ni gital CEM Pa Benedic Marak aro secretary Ma Rikse Marak-maang baksa Sombar salo Shillong songjinmao uni office chamber-o gronge agan-golpogrikangaha.
“Tom·anio mongsong nangchongmotgiparangni gimin chanchirimanio council-o kam ka·enggiparangna betonrangko on·na man·kujaengani giminba ning·tue chanchijolaha.
Asongrime agan-golpogrikani namen chu·sokaha aro iani gimin bang·a dingtang dingtang cholrangkoba GHADC-ni gital CEM aro Secretary, sorkarina agan-ku·pattitokaha. Da·o chanchianirangko gital Executive Committee (EC) niroke kamko ka·anggen aro ja·mano sorkarina sokatgen,” ine skotong minister aganaha.
Iachi namgipa biterangko man·na an·tangni ka·dongsoenganiko parakange, iana gisik on·e kam ka·gipa manderangko, mongsongbate council-o kam ka·enggiparangko sengkuchina mol·molatan baksa gital EC-na iani gimin kamrangko ka·chakatna somoiko on·kuchina aro iana jak on·patokchinaba mol·molatjolaha.
“GHADC-o pilak chagrongenggipa neng·nikanirangko agan-golpogrikangaha aro tom·ao finance department official-rangba dongpatokaha. Tom·ani namen chu·sokaha aro council-ko gital dakpiltaiani aro bang·a neng·nikanirang jekai, financial-ko gital dakpiltaiani, financial rule-rangko tariani, administrative-ko gital dakpiltaiani aro service rule-rangko tarina nangani gimin chanchirimaha,” ineba Pa Sangma agandapataha.
Tangka-paisako jakkalani bewalo mamingo donmitapani gri ong·na amna gita, e-governance ba mongsongbate computer-ko jakkalani gimin tom·anio agangrikjolaha.
Ia chanchianirangko jensomoio kam ka·chakatatahaon, on·kugijagipa betonrangko on·na chol-ramarang sokbagnok ine Pa Sangma an·tangni ka·donganikoba parakaha aro GHADC-o chagrongenggipa pilak neng·nikanirangko man·adipet seng·gnange namatna gita seokgital CEM-ni jotton ka·anirangnaba ua de·mittele aganangaha.
