Tura, Feb 20: Garo Hills Autonomous District Council (GHADC)-ni gital chief executive membor (CEM) Rakesh Sangma-ni kosako jegalanirangko daktokengani a·sel GHADC-o kamrangko ka·na man·jaengani gimin Sombar salo, a·dok sorkarini chief adviser aro North Tura-ni MLA Thomas A Sangma, jegalenggipa dolrangko Tura Circuit House-o tom·e agangrikna sienga.

Re·anggipa anti gimikan GHADC-o kamrangko ka·na man·jahani gimin gital CEM-ni kosako jegalenggipa dingtang dingtang dolrang baksa agangrikna gita Robibar salo West Garo Hills a·jani Deputy Commissioner Ram Singh, chittiko seataha.

Agangrikna okamani chittiko ADE-ni president Dalseng Bira Ch Momin, GSU-CEC-ni president Tengsak G Momin, FKJGP Garo Hills Zone-ni president Pritam Marak, AYWO-ni president Sengbath Chambugong, AHAM-ni president Georgeprince Ch Momin, FAF-ni president Brinbal M Sangma, NESO-ni assistant general secretary Manseng A Sangma aro NAS-ni president Tengrak R Marak-na on·ataha.

Dingtang dingtang dolni dilgiparangna seatgipa chittio parakatani gitade, ia tom·aniko attam 5:00 bajio ong·atanggen aro ia tom·anio sorkarini adviser Thomas A Sangma baksana gipin MLA-rangba dongpae jegalenggipa dolrang baksa agangrikanggen.

GHADC-ni gital CEM-ko jegale jingjengatengani a·sel kamrangko name ka·na man·jaengoba, re·anggipa antionin GHADC-o kam ka·giparangna jagittamni dormaharangko on·na a·bachengahachim ine nikna man·a.

GHADC-ni gital CEM-na seokako man·a bakan Rakesh Sangma, Shillong-ona dariangenba, kam ka·giparangni dormaharangko on·na gita dingtang dingtang kajinarangoniko GHADC-ni man·gniko on·atchina gita a·dokni Chief Minister Conrad K Sangma aro finance department-ko grongeahachm. Kam ka·giparangni dormaharangko on·na gita sorkari, re·anggipa antion gong kror 20-mangni gita tangka paisarangko GHADC-na chamatahachim.