Shillong, Sept 24: Meghalaya a•dokni gitcham chief minister aro opposition dolni dilgipa Mukul Sangma, Trinamool Congress (TMC)-o napskana miksongenga ine jangbingbanganirangko knasona man•engon, iani bidingo ua an•tangba talbregijasa aganchakaniko on•aiaha.
Da•o dipet gipin dolrango napna gita somoirang melikujaenga ine Dr Sangma aganaha.
MPCC-ni gital president Vincent Pala aro an•tangni gisepo ong•enggipa obostarangni gimin Hub News baksa agangrikengon, ian Congress dolni ning•o namatna nanggipa kamsa ong•aia ine Sangma aganaha. 2023 bilsini Assembly election-na uamang sakgni apsan kamrangko ka•rimna skangan ia meligrikgijaniko namatna nanggen ineba ua aganaha.
2023 bilsini Assembly election-na ua Pala baksa apsan kamrangko ka•rimgenma ine sing•on, ian nokdangni gisepo talgrikna nangchongmotenggipa kam mingsa gitasa ong•enga ine Congress Legislature Party (CLP)-ni dilgipa parakataha.
Congress dolni gisepo ku•mong nangrimaniko ong•atanio namatna nangenggipa kamrangko namatchina ua AICC-ni dilgiparangko didigen ineba Sangma parakataha.
Ua gipin ramarangko re•na miksonganirang donggenchimode maming dongnuani grian media-na parakaigen ineba Sangma aganaha.
Da•o dipet joltangni gital dolrangko bikotna nanganiko ua nikjaenga indiba gital dolko bikotna nanggenchimode ua an•tangni ka•rimska aro apsan dake gisik donggipa manderang baksa chanchirimgen ineba Sangma parakataha.
