Shillong, April 20: Shillong songjinmani Mawdiangdiang-o gital rikenggipa Meghalaya Assembly building-ni protchong-na gital taritaigipa design-ko Bristibar salo, Meghalaya Legislative Assembly-ni High Powered Committee (HPC) ra•chakangaha.

Bristibar salo, HPC-ni tom•aniko Assembly-ni Speaker Thomas A Sangma-ni dilanichi ong•atangaha aro ia tom•anio a•dokni Chief Minister Conrad K Sangma, Deputy Speaker Timothy D Shira, MLA-rang aro dingtang dingtang official-rangba bakko ra•angaha.

HPC-ni tom•a matchotani ja•man kobor ra•timgipa manderang baksa agangrikengon, gital rikenggipa Assembly-ni protchong-na taritaigipa design-ko ra•chakna aro bangki dongenggipa kamrangna nangkuenggipa korosko ra•chakna gita HPC-ni tom•aniko ong•ataha ine Assembly-ni Speaker Thomas Sangma parakataha.

Ia gital protchong-ni design-ko IIT Roorkee aro IIT Guwahati nipiltaiaha ine janapatengon, gital Assembly nokko rikani kamrang da•o a•bachengpiltaignok ine Sangma parakataha.