Shillong, Apr 14: ‘Lawei Ba Phyrnai’ minggipa gital bobil dolni bimingo, Meghalaya a•dokni Chief Minister-na ka•mikkenate email watanio mongsonggipa mandeko police-rang rim•aha aro unbaksana gipin sakgni manderangkoba sing•sandina gita rimangaha ine Bristibar salo, Meghalaya a•dokni Home Minister Lahkmen Rymbui parakataha.
Home Minister-ni parakatani gitade, an•tangtangko ‘Lawei Ba Phyrnai’ minggipa gital bobil dolni manderang ine a•kangatenba, a•dokni skulrangko boma gopretna ka•mikkenatani ja•man police-rang, ta•raken kamko a•bachengaha aro uandaken ia manderangko rim•na man•aha.
“Ia manderangni ka•mikkenataniko man•e a•doko songdongenggipa manderang kenjagokatako man•ahani gimin police-rang, ta•raken ia manderangko sandie, Budbar salon rim•na man•aha. Ia kamo gipin manderang jak dongama dongja uko police department, name am•sandienga,” ine Rymbui aganaha.
Home Minister-ni parakatani gitade, rim•ako man•gipa mande sakgittaman Shillong songjinmao songdongenggiparangan ong•achim.
Ia manderangoniko maming silchidarerangkode man•jaha indiba email watna jakkalgipa hardware aro software-rangkosan man•aiaha ineba Rymbui parakataha.
