Goalpara, Dec 16: Mija Bristibar salo Assam, Goalpara district-oniko minggni misilbegipa a·sel ong·anirangko knasoani gita, saksa ja 17 -san ong·kuenggipa bi·sako man·chape gimik sakbri manderangko buringni mongmarang doke siataha aro ia a·selo me·chikma saksaba bilongbee jokkom ong·aha.
Koborko man·soani gitade, skanggipa obostao Assam, Lakhimpur jolni rama dilmongko re·ruraenggipa garirangko mongma jaksa chadrapaha jeon bi·sa saksako man·chape sakgittam manderang siaha. Mongma doka man·e sianggiparangoniara, Zaibar Ali, Ramani Rabha aro ja 17-san ong·kuenggipa Rabha bi·sa ong·achim. Ia a·selo, sianggipa Rabha-ni jikgipaba bilongbee saknaako man·aha ine parakataha.
Iani bidingo Goalpara-oni saksa mandeni koborna aganatengon, jaksa buringni mongmarang Meghalaya–chini ong·ongbae Goalpara jolo badita salrangonin songni mal-gamrangko nosto ka·enga aro ua mongmarangko rike galchina gita chinga forest department-koba mol·molahachim indiba nanga gita uamangni ja·kurangko de·jani a·sel da·alo sakbri manderang mongma doka man·e sina nangaha ine an·tangni suk ong·gijaniko parakataha.
Iani bidingo nanga gita ja·kurangko de·ate man·adipet mande aro mongmani gisepo so·so-jengjeng ong·aniko bon·atchina gita Assam-ni skotong minister Pa Himanta Biswa Sarma-ko chinga mol·mola ineba ua agandapataha.
Obosta ong·ani bidingo Goalpara-ni DC, Khanindra Choudhury-ni agan-talatani gita, ia a·selara attamchipak 1 ata bajimango Sigri minggipa songo ong·aha aro jaksa mongmarang batanggimin jagnimangoni cha·anirangko am·jojoe ramako batsotronga, indakmitingo bolgni gariko salgiparang gipin garirang neng·taktokoba neng·takpagija saldraani a·sel iandakgipa obostaona sokaha ine u·iataha.
Damgipin biapo ong·gipa a·selo, apsan district-ni Solmari minggipa songo forest department-o kam ka·enggipa mandeko mongma mangsa doke siataha. Ua a·selara attam 6 bajimango ong·achim jeon Sahadeb Rai minggipa mongma doka man·e siangaha.
Indake ong·engon, batanggimin bilsi 10-rango mongma aro mandeni gisepo so·so-jengjeng ong·anirangniko sorkarini hisap man·ani gitade, mang 250 buringni mongmarang dokanichi sak 800 manderang siaha.
