Imphal, May 16: India aro Myanmar a·songni sima-ari jolo donggipa Chandel district-ni ning·ogipa Phaisenjang songoni jachange donggipa sak 96 manderangko Assam Rifles, mija Sombar salo adasurango gate rimongkatbaaha.
Manipur a·doko dingtang dingtang jatrangni gisepo kajia golmalrang ong·na a·bachengaoni intal ua songoni jachange dongenggipa sak 96 manderangko Assam Rifles-ni a·tipona rimbae donenba uamangna nirok-simsakanirangkoba on·angaha. Indake ong·engon, Assam Rifles Camp ba a·tipara namen songadambatgipa biapo ong·ani gimin aro jolni manderangna nambata dongchakani biaprangko on·na gita AirForce MI 17 helicopter ba adasurangko jakkale uamangko rimongkatbaaha ine koborna parakataha.
Assam Rifles Camp-o uamangni dongengmiting somoio, chel·chakani, cha·ani-ringani aro tuchak-dongchakani biaprangko on·an baksana, songtang-noktangoni ma·drang-maharirang baksa agan-golpogrikatna gita uamangna agangrikani cholrangkoba on·aha ine koborna u·iataha.
