Shillong, Nov 08: A·songni gipin bakrango gitan, Shillong songjinmani Sikh manderangba mija Sombar salo, Guru Nanak Dev-ni chang 553-gipa atchiani salko gisik ra·e maniangtokaha.
Ia dingtangmanchagipa salko Shillong songjinmani Sikh Centre Sri Guru Singh Sabha-ni manianganio, Sikh bebera·giparang, apsan bi·rimanirangko dakan baksa bebera·rimskarangna kotiprangko on·e kusi-katchanian gape maniangtokaha.
Indake ong·engon, ia bilsi Guru Nanak Jayanti-ko manianina a·dokni Governor BD Mishra, sakanti bebera·giparangna uni namgipa sikanirangko on·atan baksa, mande jatna, jong-adana aro kakketanina an·tangtangko on·kange janggi tangchina aroba Guru Nanak Dev-ni skianggiminrangko gisik aro bebeo ja·rike janggi tangtokchinaba sakantikon didiange, uni namgipa skianirang an·chingni salanti janggi tanganirango dongpae an·chingni songsalo meli-nangrimaniko bilakdapatangchina ineba ua agan-ku·pattiangjolaha.
