Shillong, Jan 5: GVK-EMRI-o kam ka•enggipa manderang, an•tangtangni dabianirangko knachakjaengani gimin jingjengatanirangko dakengon, HNYF dolba uamangni jingjengatanio chakpaaniko parakataha.
Iani bidingo kobor ra•timgipa manderang baksa agangrikengon, GVK-EMRI-o kam ka•giparangna uamang chakpaaniko on•gen aro kam ka•giparangni dabianirangko knachakjagenchimode bilakbate jingjengatanggen ine Hynniewtrep National Youth Front (HNYF)-ni president Sadon Blah parakataha.
Meghalaya a•doko ia company aro health department songgigrike GVK-EMRI-ko a•bachengataoni batanggimin bilsi 10-ni gisepo gong kror 50-mangko ra•e kataha ineba ua matnangataha.
Blah-ni aganani gitade, GVK-EMRI-o kam ka•enggiparangna dormaharangko on•anioba bang•en ong•gija dakanirangko nikna man•ahachim.
Office-o nangchongmotgipa bosturangkoba kam ka•giparangna on•jaenga ine janapatengon, EMRI-ni kamrangko gipin biaponi contractor-rangna on•ani pal a•doktangon 108 service-ko Health Services Directorate-chi chalaiskana gita sorkari cholko ra•gatna nanga ine HNYF-ni president dabiangaha.
Emergency service-ko chalaina gita ia company-na on•gipa contract 2021 bilsini March jaon bon•ahani gimin contract-ko ra•dodapgija bon•atsrangchina gitaba ua sorkariko didiangaha.
Ia company-ni contract-ko bon•atjagenchimode uamang an•tangtangan ia company-ni kamrangko chipatgen aro bilakbate jingjengatgen ineba HNYF-ni president mikrakataniko on•angaha.
Indake ong•engon, Budbar salo EMRI workers union-ni dilgiparang, Health department-ni principal secretary Sampath Kumar baksa dikdiksana tom•e chanchirimaha aro ua uamangni dabianirangko niatna gita ku•rachakaha ine Meghalaya EMRI Workers Union-ni president Microlina Syiemlieh parakatkaaha.
Uamangni jingjengataniko dontongchina Sampath Kumar, uamangko mol•molahaoba uamangni dabianirangko chu•sokate on•na sorkari see on•kujaskal uamangni jingjengataniko dontongkujawa ineba Syiemlieh parakataha.
GVK-EMRI-o kam ka•enggiparangni dormaharangko bariatchina, uamangni kamrangko regularise ka•china aro uandakgipa gipin dabianirangko knachakjaengani gimin re•anggipa Sombar waljatchi dipetan EMRI-o kam ka•enggiparang kamtangtangko dontonge jingjengatengachim ine nikna man•a.
