Shillong, May 13: Them Iewmawlong-ni Harijan Colony-o songdongenggipa dol 342 nokdangrangko gipin biapona apjitna gita a•dok sorkarini ja•ku de•anio, ia nokdangrangna nokrangko rike on•skachina aro dingtang a•ako on•china gita Harijan Panchayat Committee (HPC)-ni dabienganiko Meghalaya High Court-ni ukil VGK Kynta-ba raken jegalataha.
Apjitatako man•enggipa dol 342 nokdangrangna, nokdangprakon 200 square metre-ni nokko rikanio korosko gamchina aro European ward-ni ning•on acre 10 a•ako on•skachina gita HPC, a•dok sorkario dabiengachim ine nikna man•a.
Indake ong•engon, Harijan Panchayat Committee-ni iandake dabianiko Meghalaya High Court-ni ukil VGK Kynta raken jegalataha aro uamangni dabianiara nanga bate dam rakdugaaha ine parakataha.
“Anga Harijan-rangna ka•sachaka beben maina uamang Meghalaya a•doko neng•bee janggi tangenggiparang ong•a. Uamangba chengonin a•doko donge sorkarina dangdike on•ahani gimin man•na nanggipa manderangnade sorkari maikoba on•pilskana nanga indiba niam gri songdongenggiparangnade on•pilna nangani katta dongja. Indiba HPC-ni iandake sorkarioniko dabianiara namen ong•ja maina uamangni dabianiara nangana bate dam rakdugaaha,” ine Kynta, Hub News-na parakataha.
Sorkarini dingtang dingtang department-rango kam ka•e Harijan colony-o songdongenggipa manderangsan, dingtang biapona apjitako man•na kraa indiba niam gri ia biapo songdongenggipa manderangkode niamo pangchake ra•gale galanisa ong•enga ineba Advocate Kynta parakataha.
Harijan Colony gita dakanggipa rama, chong•motan Syndicate Bus Stand-oni Bimola-ona dakanggipa ramako manderang re•rurana watchina gita didiatengon, dingtang dingtang NGO-rangko aro jolo songdongenggipa manderangkoba maming so•sojengjeng ong•atani kamrangko ka•jachina gita Advocate Kynta mol•molataha.
