Shillong, Feb 23: Sombar salo a•gilsakko watanggipa gitcham home minister aro Sohiong constituency-ni UDP candidate HDR Lyngdoh-na dingtang dingtang biaprangoni manderang tom•chimongbaenba, Bristibar salo bon•kame mande ra•pilskaaniko dakangaha.

Lyngdoh sagiko pilakan ka•sabee ‘Maheh’ ine okamtokachim aro uni manggisiko Bristibar salo, Sohiong-ni Shiliang Dongki-o donggipa uni noko gope galaha.

Sombar salo ua, Mawmaram-o jinma tom•bimonganiko ong•atanio bakko ra•engmiting somoio tanggitik ka•tong saaniko man•enba ga•akgopahachim aro uko bakan attamni 4:00 bajimango Bethany Hospital-ona ra•angahachim. Indake ong•genchimoba ua nampilna gita man•jae apsan salon a•gilsakko watangahachim.

Lyngdoh-ni siangani ja•man, Sohiong constituency-ni MLA election-ko Election Commission ra•doatskaahachim.