Shillong, Dec 07: Biljime sagipa manderangko sana-bananio nanggipa oxygen-ko bikotchakgipa biapko Shillong, Nazareth Hospital-o Meghalaya-ni Health & Family Welfare Minister Pa James Sangma, Mongolbar salo oprake on·angaha.Iako oprake on·ani somoio aganangengon, sajinmani gittamgipa chang sokbagnigipana pilak tarisamsoaniko bilakdapatna gita sorkari, gong kror 2 lak 51 tangka-paisarangko Nazareth Hospital-na botaha, indake a·dokni private hospital-rangna chu·gimik gong kror 14.4 tangkarangko sorkari botaha ine Pa Sangma parakataha.Ia oxygen bikotchakgipa biapko donanichi Nazareth Hospital-nasan jakkaltogipa gam ong·aijawa indiba a·dok gimiko sana-bananiko on·anirangnaba namgni ong·gen ineba minister aganangkuaha.

Unbaksana, hospital-rango chasongni kri jakkalna nanggipa technology-rangko aro sana-bananio mongsong nanggiparangko ra·bae done pilak sana-bananiko on·ani kamrango dingtanganiko ra·bana aro mongsongbate Covid-19 sabisichi agre su·pekeaniko komiatna gita sorkari, daitoko ra·gipa gipinrang baksa bakrime kamrangko ka·na re·chakatenga ineba Pa Sangma janapatjolaha.