Shillong, Jan 12: Hima Sohiong-ni Lyngdoh, tangka paisarangko jakkalsretenga ine matnangenba, Budbar salo Hima Sohiong-ni joint action committee (JAC), uko ra•galchina dabie Khasi Hills Autonomous District Council (KHADC) office-ona re•jomangaha.

JAC-ni secretary Marchkupar Thabah-ni kobor ra•timgiparangna parakatani gitade, Hima Sohiong-ni Lyngdoh Bashemphang Thabah, ru•uta somoirangonin Hima-ni tangka paisarangko ong•gija kamrangna jakkalengachim.

“Chingni RTI ka•e am•sandianio man•ani gitade ua an•tangni man•gninasa Hima-ni tangka paisarangko jakkalenga aro iani giminsa chinga uko ra•galchina dabienga,” ine Thabah aganaha.
Iani bidingo JAC-ni gita KHADC-ni chief executive member (CEM) Titos Chyne-na chittikoba on•angaha aro ta•raken ja•kuko de•china dabiangaha.

Niamo pangchake district council, Lyngdoh-ko ra•galna bil donga ine Hima Sohiong-ni JAC parakataha.