Guwahati, May 10: Himanta Biswa Sarma-ni sorkari rikani bilsisa gapaniko manianiko Guwahati songjinmao manianiona Union Home Minister Pa Amit Shah re·baon bang·bea manderangni tom·chimonganichi BJP dolni bilakenganiko mesokangaha.

Assam a·dok sorkari May jagimikan Karma Jagya programe-ko ong·atange Himanta Biswa Sarma-ni sorkari rikani bilsisa gapaniko maniangna tik ka·aha. Ia gisik ra·aniko dakani jao pilak sorkarini minister-rangan constituency-tangtangonan re·e manderangni nangnikaniko niroke kamrangko ka·anggen aro gital chamgimin tangka paisachi kamrangko a·bachengna do·ga oprakanikoba dakanganggen.

BJP dolni sorkari rikani intal Assam-oni Hyderabad-ona matchu badingsrukaniko do·gako chipna man·aha. Bangladesh a·dokoni niamgri napdraabaniko champengani bilakbataha. A·arangko a·kangdraani dongjaha aro unbaksa gondu grongko Kazirangaoniko cha·ue badingani dongjaha ine Union Minister Pa Amit Shah tom·anio aganaha.