Shillong, Feb 16: Hynniewtrep National Liberation Council (HNLC) bobil dol baksa agangrikani kamrangko a•bachengatna man•na gita Budbar salo, Meghalaya a•dokni Chief Minister Conrad K Sangma, Ministry of Home Affairs (MHA)-ni Home Secretary-ko Delhi-o grongeaha.
MHA-ni Home Secretary-ko grongeani somoio kobor ra•timgiparangna talataniko on•angengon, HNLC bobil dol baksa agangrikani kamrangko a•dok sorkari, ta•raken a•bachengatna nangnikenga aro iani bidingo Ministry of Home Affairs (MHA) baksa agangrikangkuna nisengenga ine Meghalaya Chief Minister parakataha.
“Maming niam donna gri aro Constitution-ni niamo pangchake agangrikna tariaha ine HNLC-ni seatgipa chittiko chinga man•soahani gimin, maikai ia kamko jako ra•e ka•angna man•gen, iani bidingo MHA baksa agangrikna anga re•baaha,” ine Sangma parakataha.
Tom•tomaona re•bapilna gita India sorkari baksa agangrikna tariaha ine HNLC bobil dolni seatgipa chittiko man•soaha ine re•anggipa February 9 tariko Meghalaya sorkari parakatahachim.
