Shillong, Mar 17: Hynniewtrep National Liberation Council (HNLC) bobil dol baksa sorkarini agangrikani bakan matchotna siengaha ine sorkarini ku•wattimgipa aro Cabinet Minister Paul Lyngdoh parakataha.
Sukrobar salo, Cabinet tom•a matchotani ja•man kobor ra•timgipa manderang baksa agangrikengon, champengatako man•gimin bobil dol aro sorkarini gisepo agangrikani da•o bon•kamgipa bakona sokengaha aro bakan matchotgnok ine Lyngdoh parakataha.
HNLC bobil dol baksa agangrikani bidingo Meghalaya a•dokni Governor-ba da•o ong•atna sienggipa Meghalaya Legislative Assembly-ni Budget Session-ko oprakani salo aganprakangna gita sienga.
Sorkari baksa agangrikaniko a•bachengna gita re•anggipa bilsini August 25 tarikon, HNLC bobil dolni sakbonga dilgiparang a•dokona sokbaahachim ine nikna man•a.
HNLC bobil dolni dilgiparang, maming niamrangko dongija, ma•mong aro Meghalaya sorkari baksa agangrikna skaniko mesokahachim.
Silchidarerangko pakwatani giminde HNLC-ni dilgiparang mamingkoba janapskajahachim.
