Shillong, Feb 9: Champengatako man•gipa HNLC bobil dolrang tom•tomgrikanina sorkari baksa agangrikna tarisoaha aro agangriknasigipa mandeko ta•rake sandichina ineba HNLC ni janapataniko, Ian namgipa ja•ku ga•ani ong•a, unigimin skotong minister iako ta•raken kam ka•na nanga ine BJP ni MLA Sanbor Shullai aganaha.

“Ian a•dokni skotong ministerni gisik gnange kam ka•ode name agangrikna man•gen aro dingtang dingtang toromni dilgiparangba chakpaaniko on•e, uamangni gital janggi tangmikkanganina uamangna Isolo bi•tokenga” ine Shullai agandapaha. “Anga an•tangan iani daiko ra•e skotong minister baksa ma•mong sorkarina mol•molani lekkakoba on•eaha” ineba ua aganaha.