Shillong, Feb 16: Champengatako man•gipa Hynniewtrep National Liberation Council (HNLC) bobil dol baksa tom•tomanina agangrikna gita kamrangko a•bachengdilahani gimin Laitumkhrah constituency-ni MLA Ampareen Lyngdoh, Meghalaya a•dokni Chief Minister Conrad K Sangma-ko mittelpilangaha.
Ampareen Lyngdoh-ni parakatani gitade, HNLC bobil dol aro sorkarini gisepo tom•tomanina agangrikaniara skangonin Khasi aro Jaintia Hills a•jarango songdongenggipa manderangni nangnikani ong•engachim.
HNLC bobil dol baksa agangrikna da•o kamrangko a•bachengatengahani gimin Chief Minister-ko mittelpilangengon, HNLC baksa agangrikani indita bilsirangna bon•chipahaoba da•o a•dokni Chief Minister an•tangan kamrangko a•bachengdilengaha ine Lyngdoh, an•tangni kusi ong•aniko parakataha.
HNLC bobil dol baksa agangrikani chu•sokgipa ong•china ua aro Congress doloniko ra•gala man•gipa gipin sakbri MLA-rang, sorkarina chu•gimik bakrimaniko on•gen ineba Lyngdoh parakataha.
HNLC bobil dol, ma•mong sorkari baksa agangrikna tarianiko a•dok sorkarina see u•iatahani gimin Budbar salo, a•dokni Chief Minister Conrad Sangma an•tangan, Ministry of Home Affairs-ni Home Secretary-ko grongeahachim.
