Shillong, Sep 22: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so•otanio jak donggipa pilak police officer-rangnan niamo pangchake sastirangko on•na man•na gita ia a•selni bidingo Central Bureau of Investigation (CBI)-chi inquiry-ko dakatchina Hynniewtrep Youth Council (HYC), a•dok sorkario dabiangaha.
Iani bidingo a•dokni Chief Minister Conrad K Sangma-na sedoatengon, Cheristerfield Thangkhiew-ko police-rangni so•otanio jak donggipa pilak manderangnan nanga gita sastirangko on•na man•na gita jakgitel ong•gipa investigating agency-chi am•sandiatchina dabienga aro iani bidingo badiaba dolchi inquiry-ko dakna a•bachengataha ong•ode iako CBI-na pakwatskachina dabienga ine HYC parakataha.
Re•anggipa 2021 bilsini August 13 tariko Thangkhiew-ko so•otani ja•man manderangni gisepo ding•chaoanirang ong•katahani giminsa a•dok sorkari, manderangko ka•sinatna gita One Man Commission-chi inquiry-ko dakchina ge•etaniko on•aiaha ineba HYC matnangataha.
Ia a•selni bidingo am•sandina gita Commission-ko songaoni jaskuni ja•mansa inquiry report-ko a•dok sorkarina on•ahachim.
HNLC bobil dolni gitcham general secretary Cheristerfield Thangkhiew-ko police-rangni pringwal 3:00 bajio rim•na re•anganiara chanchininggija kam ka•aniko mesokani ong•aha aro police-rang bilko nangana bate jakkaljagenchimode uko sianiona sokatjawachim ine ia a•selni bidingo inquiry dakgipa commission-ni report-o parakahachim.
Indake ong•engon, ia inquiry report-o police-rangni kamko dos galahaoba da•onan iani bidingo maming ja•kurangko de•kujaengani gimin HYC, a•dok sorkariko matnangataha.
