Shillong, Jan 7: HNLC bobil dolni gitcham dilgipa Cheristerfield Thangkhiew-ko so•otani bidingo judicial inquiry-ko dakgipani gimin Sukrobar salo, Meghalaya Human Rights Commission (MHRC)-ni Chairman Justice V Vaiphei-ni dilanichi skanggipa changna hearing-ko Shillong-o ong•atangaha.
Vaiphei-ni u•iatani gitade, mande jinmako aro sianggipa mandeni nokdangko gale, camera-o inquiry-ko dakchina Meghalaya police, dorgastoko on•aha. “Camera-o inquiry-ko dakchina a•dok sorkari mol•molgenchimode iako dakna niamo on•a indiba sing•anide camera-o inquiry-ko dakanio sianggipa Mandeni nokdangko man•chapgenma ma galgenma?” ine MHRC-ni Chairman aganaha.
Camera-o inquiry-ko dakna on•engon, sianggipa mandeni nokdangna skia man•gipa ukilsan dongna man•aigen, aro commission-ni official-rang, nangchongmotgipa police officer-rang, sianggipa mandeni nokdangna ukil dakenggipa aro commission-na agrede darangba inquiry-o bak ra•pana aro MHRC-ni court room-o napna man•jawa ine niamko donskaaha ine Vaiphei parakataha.
Gnigipa hearing-ko January 14 aro 15 tariko ong•atskaenba, a•dok sorkarini sakkirang donggenchimode ua somoio ra•angskagen ineba Vaiphei parakataha.
Inquiry-ko dakanio neng•nikanirang donge ta•rake matchotna man•jagenchimoba ua ta•raken ia inquiry-ko matchotatna miksongenga ineba MHRC-ni Chairman parakataha.
Re•anggipa 2021 bilsini August 13 tariko HNLC-ni gitcham dilgipa Cheristerfield Thangkhiew-ko police-rangni so•otani ja•man, a•doko so•sojengjeng ong•anirangko nikna man•ahani gimin ia a•selni bidingo judicial inquiry-ko dakchina gita a•dok sorkari ge•etahachim ine nikna man•a.
