Shillong, Oct 19: A·dokni damgittam assembly constituency-rango memborrangni biap bangbang ong·enggipao kolgapatna gita eleksinrangko ong·atnasiengani gimino HNLC bobil dolni ka·mikkenatanina maming dakeba kenjachina gita Meghalaya-ni home minister Pa Lahkmen Rymbui, Mongolbar salo manderangko didiangaha.
National People’s Party (NPP) dolna pu·onjachina gita adita salrangna skang mangmang champengata man·gipa HNLC bobil dol a·jani pu·ongiparangko mikrakatangahachim.
NPP dolna vote on·jachina gita HNLC dolni ka·mikkenataniara politicalni kattasan ong·aia ine home minister aganangenba, jeba democracy a·songo, India-o sakanti pu·ongiparang namnikatangko basee seokna bil donga, political dolba uamangni candidate-ko basee chakatatna bil dongaia, ian politicalni kattasa ong·a, manderangba bil dongatangko ma·sia ine Pa Rymbui parakataha.
Ia ka·mikkenataniko sorkarini dal·e ra·a ba ra·gijaniko sing·on, “sorkari pilakni gitan champengsoanirangko dakatenga aro maiba ong·gija kamko ka·na jotton ka·gipa jeba mandeni kosako raken bichalaniko dakanggen aro sorkari iana nanchongmotgipa ja·kurangko de·angkugen,” ine Pa Rymbui talataha.
Police department jeni gimin ka·mikkenataniko pangnaba namrenge ra·a dongkuja ine aganatan baksa a·doko tom·tomaniko rakkina aro ong·gni obosatako champengsona gita man·adipet uamang jotton ka·anggen ineba home minister agandapataha.
