Shillong, Sept 29: North Eastern Indira Gandhi Regional Institute of Health & Medical Sciences (NEIGRIHMS)ni director-na gital seokako man·gipa Prof. (Dr.) Nalin Mehta, uni mikkangchi dangdike on·anio pilakna skangba hostpitalo sana-bananiko on·enggipa a·dokni manderang aro songsul a·dokni manderangna kamko ka·na gita nangnikbatenga ine Butbar salo aganangaha.
Da·omitingo adita dingtang dingtang gadangrango kamko ka·enggipa staff-rang chu·onggijanichi neng·nikaniko man·enga ine aganengon, re·baenggipa salrango Covid sajinma gittamgipa changna sokbataijaha ong·ode anga iandakgipa neng·nikanirangkoba man·adipet namatna gita jotton ka·anggen ine Prof. Mehta parakataha.
Gnigipao, hostpitalo mongsonggipa nengenggiparangko matchotate on·na gita ua nangnikenga ine aganangenba, hospital-o minggipin project-rang gnang jekai Regional Cancer Center aro gital Institution building-ko rikatanirang sajinmani a·sel ja·donggaataniko man·aha, maina hospital-o mongsong nanggiparang donggijade sana-bananiko apalbatatna gita man·jawa ineba ua agandapataha.
Indake janapjolna gita man·gen je, mija September 11 tarikoni kamtangko jako ra·chakatbaenggipa Dr Nalin Mehta, NEIGRIHMS-ni director-na seokako man·na skang ua, New Delhi-ni All India Institute of Medical Sciences (AIIMS)-o Physiology-ni Professor ong·e dangdike on·engachim.
Antartica-o donggipa Indian Research Base – Maitri –o December 1992 oni 1994 bilsini April jaona 12th Indian Scientific Expedition-ni saksa membor ong·pae research-ko dakchenggipa India-ni civilian doctor-ba ong·achim.
Indake uko 1994 -ni November jao Nepal, Dharan-o donggipa ge·sa niksenggipa medical college aro hospital, B.P. Koirala Institute of Health Sciences-o sorkarini dakchakatgipa project-na saksa expert faculty membor ong·e kamo donataha. Iana agreba, ua biapo Department of Physiology and Clinical Physiology laboratories-ko a·bachengate on·anio uaba saksa bakko man·pagipa ong·a.
AIIMS-o dangdike on·baani ja·man, chugipa gadangni Fogarty International Bioethics Fellowship-ni upadiko batanggimin 2002 bilsio una on·angaha. Fellowship-ko matchotani ja·man University of Toronto-ni Joint Centre for Bioethics-o Bioethics-ni Masters’ Degree-ko una on·aha.
Indake, National Knowledge Commission-ni agan-ku·pattianirango pangchake kamko chu·sokate on·china gita Ministry of Health & Family Planning-ni songanggipa National Health Information Network-ni membor ong·e uko seokangaha.
Indake ong·engon, a·gimikchina giprorogipa sabisini gimin agananganio, Covid sajinamani tikako ra·giparang a·doko namen komienga jenan jajrengna nanganiba ong·a ine seokgital NEIGRIHMS-ni director aganangaha.
Sajinmani skanggipa changgni dake sokbaaniko hospital-o warachakna man·ahani gimin a·dokona mabakai gittamgipa chang ong·e sabisi sokbadaptaia ong·oba uko warachaksona gita hospital chu·ongen tarisoaha ine Mehta parakataha.
Dal·dalgipa a·songrangko man·chape nambatgipa sanchakani cholrang donggipa hospital-rango aro a·gilsakni pilak a·songrangon Covid sajinmani rang·san giproroaniko sanna amsoktokjaha aro ia apsandakgipa obosta da·o sokbataigenchimode NEIGRIHMS-ko man·chape jeba sanchakgipa biaprango ba hospitalrango sagipa manderangna sana-bananiko chu·onge on·na gita man·jawa ineba director agandapataha.
Uni aganangkuani gita, sorkarini dongimin mongsonggipa niamrang jekai mikkango mask ganani, saksa-sakgipinoni chel·tange dongani, jaksujringani aroba gipinrangko manderang bebeo ja·rika ong·ode manderang ia sabisiko man·aniba aditan komigen, unbaksana sajinmani tikako ra·na bilsi chu·onggiminrangko, tikarangko su·e ra·tokchina aroba sorkarini ge·etanirangko manitokchinba ua a·dokni manderangko didiangjolaha.
