Jowai, Jan 19: National Highway (NH-40) ramani Ialong Toll gate gita re•ruraenggipa garirangoniko kajinarangko gilani bidingo chanchirimna gita Budbar salo West Jaintia Hills a•jani Deputy Commissioner, NHAI-ni official-rang, Jaintia Students Movement (JSM)-ni dilgiparang, All Jaintia Commercial Vehicle Association (AJHCVA) aro Ialong songni dilgiparang baksa tom•aniko ong•atangaha.
Ia tom•anio NHAI-ni dongimin niamrangni gimin official-rang talataniko on•angengon, NH rama gita re•ruraenggipa pilak garirangan FASTag dongna nanggenchimoba bang•bata garirangan FASTag gri re•ruraengani gimin uamang toll gate-rango gong 30-ni pal gong 60-ko gamna nanga ine parakangaha.
Indake ong•engon, ia niamko dingtang dingtang dolrang jegalangskaenba, garirangna aro mongsongbate para salgipa garirangna FASTag-ko nangchongmota ine niamko dongenchimode ian para sale cha•enggiparangna namen noksan ong•enga ine parakangaha.
Uandaken jinma tom•e chanchirimangani ja•man, Jaintia Hills-ni pilak garirangan toll gate-o kajinarangko gamjawa aro ia niamko ra•galjagenchimode uamang jingjengataniko dakna draataniko man•gen ine NGO-rang mikrakataniko on•angaha.