Jowai, Jan 17: Fastag donggijagipa garirangoniko pilak National Highway (NH)-ni Toll Plaza-rangon changgni dake kajinako ra•china National Highway Authority of India (NHAI)-ni ge•etaniko on•ahani gimin Jaintia Hills a•jao donggipa dingtang dingtang dolrangni jegalgrimani ja•man West Jaintia Hills a•jani Ialong songni dilgiparang, dingtang dingtang dolrang aro Toll Plaza-ni manager-rang baksa tom•e chanchirimangaha aro iani bidingo West Jaintia Hills a•jani Deputy Commissioner, NHAI-ni official-rang, Ialong songni dilgiparang aro NGO-rangni gisepo apsan melie songgigrikaniko dakkujaskal ia Ialong Toll Plaza-o para salenggipa garirangoniko kajina ra•kujawa ine tik ka•angaha.
NH-rango donggipa Toll Plaza-rango Fastag donggijagipa garirangonikode changgni dake kajinako ra•china NHAI-ni ge•etaniko on•ahani gimin Jaintia Hills-o para garirangko chalaienggipa manderang aro gariko saltimgiparang NHAI-ni kosako jegalanirangko dakna a•bachengahachim.
Iani bidingo Jaintia Students Movement (JSM) dolni dilgiparangba badi ka•aniko man•soe adita salrangna skang, NH-6-o donggipa Ialong Toll Plaza-ona re•angenba sing•sandianirangko dakeahachim.
Uandaken dingtang dingtang dolrangni jegalanirangko man•e Ialong songni dilgiparang, NGO-rang aro Toll Plaza-ni manager-rang baksa tom•e chanchirimangaha aro iani bidingo pilakni namnikani gita ja•kuko de•na man•kujaskal, para salgipa garirangoniko ia Ialong Toll Plaza-o kajinako ra•jana gita tik ka•e donangaha.
