Shillong, Feb 25: ICMRni phase II gipa STEMI ACT PROJECT-pko, Health and family welfare minister Shri James PK Sangma Shillongni Pine wood Hotelni Banquet hallo a•bachengate on•angaha. Ia projectni gita ka•tongni sabisiko man•gipa manderangna dakchakani ong•gnok aro ian namen kusini katta ong•a ine James PK Sangma NEIGRIHMSna nama skaniko on•e aganangaha. Ia project-ko Meghalaya a•dokna ra•bae on•gipara NEIGRIHMS-oni ong•genchimoba ia cholko uamangni HUB aro spoke modelrango aroba dam chet hospitalrang jekai, Civil hospital Shillong, Ganesh Das Government Maternity and child Health hospital, Reid provincial Chest Hospital, Dr. H Gordon Robert Hospital, Nazaret Hospital, Woodland Hospital, Super care Hospital aro Bethany Hospitaloba man•anggen.
Ka•tongni sabisi aro ka•tong teke sianirang an•chingni a•songo ramram gitasa ong•pilaiengjok. Unigimin ia sabisi aro saanirangko name sanna man⋅agita ia indakgipa projectrangko an•chingni a•dokonaba ra•baaniara namen namgipa kobor ong•chongmota aro an•chingna dakchakaniko on•chongmotgen ineba minister agandapaha.
NEIGRIHMS ni director Dr. Nalin Mehtani aganani gitade, ia project-ara ka•tong sagiparangko name niroke ka•na manchaan on•gimin ong•a. Rang•gitik ka•tong teke sagiparangko dikdiksani gisepon cloth buster (Thrombolytics) samko on•e sangipa ong•a. Ia samni dam namen rakbeani gimin dongpagijagiparangde ia samko brena man•parongjaenga jeni daman 20,000, oni 25,000 ong•a, indioba da•ode ia projectni gita ia pilakkon indin man•aignok.
“Jean ka•tong saaniko man•engachim ba ka•tong teke saani chinko man•achim uarangna spoke centre-rango ECG ka•e nigen aro uarangko nanggipa lekkarangko kachape NEIGHRIMS ni command centreni phone numberona watatna nanggen aro sagipa mande indin samko man•a kraa ine nikode una indin sananiko on•gen” ine projectni Principal Investigator Dr. Amit Malviya talatangaha.
