Shillong, March 2: Meghalaya a·doko Inner Line Permit (ILP)ko ra·gatchina dabianiara a·songni kosako chakatanide ong·ja ine aganengon, a·bri-a·kong jolo songdong-a·chabagipa mande jat ong·aniko chelchakangna minggipin niamrangchi bilakdapatanisa ong·a ine a·dokni skotong minister Pa Prestone Tynsong agan-talataha.
A·doko Inner Line Permit (ILP)ko ra·gatchina dabianiara a·songni kosako chakatani ong·ode Meghalaya-na chu·gimik jakgitelko on·china gita ma·mong sorkariko didiange Khasi Students Union (KSU)ni aganangipa kattana aganchakengon, “ILP-ko a·dokna dabianiara a·songni kosako dakdraanide ong·chongmotja aro Assembly, a·dok sorkakari aro NGO-rang ong·oba…..chinga gimiknan ILP-ko nanga,” ine Pa Tynsong aganangaha.
“Chinga gimiknan ILP-ko nanga inengon, a·doko jelbatgipa a·bri jatni mande ong·aniko mikkangchi chelchakangna gita ian mingsa niamsa ong·a. ILP-ko a·doko dabienganio maming ong·gijaniko ba namgijanikode nikatja,” ineba dakchakgipa skotong minister agandapaha.
Ru·uta bilsirangoni ILP-ko on·china dabibaengon iako ra·gate on·na ru·utatengani gimin sing·anina, chinga sorkarini gita iani bidingon ning·tue ma·mong baksa agangrikenga aro batanggimin changosan chinga Delhi-chiba doange Union home minister Pa Amit Shah-ko gronge agangrikbaaha aro da·oba ia jao a·dokona uni re·baaniko sengsoenga maina ua an·tangan chingna ku·rachakataha,” ine ua parakaha.
Janapjolna gita, batanggimin somoio a·dok sorkari aro dingtang dingtang organization-rang ma·mongni Home Minister Pa Amit Shah-ni Shillong songjinmaona wenbamitingo iani bidingon memorandum-rangko paltangtang on·angahachim.
Indake ong·engon, ia March jao a·dokni skotong Shillong-ona re·bataiao iani gimin asongrime agangrikna cholko man·gen ine Amit Shah, batanggimin somoio a·dokni pal Delhi-china doange grongbagipa dilgiparangna ku·rachakataha.
