Shillong, Sep 12: Meghalaya a•doko Inner Line Permit (ILP)-ko ra•gatchina gita dabienggipani bidingo a•dok sorkari, India sorkarini aganchakanina sengkuenga ine Sombar salo, Meghalaya a•dokni Chief Minister Conrad K Sangma parakataha.
Assembly-ni Autumn Session-ko ong•atanio Nongpoh-ni MLA Mayralborn Syiem-ni sing•anina aganchakaniko on•angengon, ILP-ni bidingo aganchakanide da•o Home Affairs Ministry-ni jakosa ong•ahani gimin maming ja•kurangko de•na skangba ma•mong sorkarioni aganchakanina sengna nangkugen ine Chief Minister parakataha.
Re•anggipa bilsini February 23 tariko Union Home Minister Amit Shah-ni Meghalaya a•dokona re•baani somoion ILP-ko man•chape dingtang dingtang nanganirangna a•dok sorkari, memorandum-ko on•atmanaha ineba Chief Minister parakataha.
Chief Minister-ni parakatani gitade, a•doko ILP-ko ra•gatchina dabianirang batroroengako nike 2019 bilsini December 19 tarikon Meghalaya Democratic Alliance (MDA) sorkariba dingtangmancha resolution-ko pass ka•e sorkarini gisik nanganiko mesokaha.
Ia resolution-ko a•dok sorkari, 2019 bilsini December 23 tariko MHA-na watataha aro uni ja•man sorkari, 2020 bilsini November 17 tarikoba dingtangmancha chittiko seattaienba, iani bidingo MHA baksa agangrikahachim ineba Chief Minister parakataha.
Citizenship Amendment Act (CAA)-ko ma•mong sorkarini ra•gatani ja•man dingtang dingtang dolrang, a•doko ILP-ko ra•gatchina dabianiko bilakbatataha ineba ua aganaha.
Chief Minister-ni parakatani gitade, 2020 bilsini February 20 tariko dingtangmancha a•dokni MLA-rangba, Union Home Minister-ko New Delhi-o grongeahachim aro ua tom•anio MLA-rangna, Meghalaya Legislative Assembly-o pass ka•gipa resolution-ko ma•mong sorkari niengkua ine Home Minister parakatenba, a•doko songdongenggipa Tribal-rangna on•gimin bilrangko gimaatjawa ine ku•rachakaniko on•atahachim.
Re•anggipa bilsio dolsni NGO-rangni membor-rangba union home minister-ni a•dokona re•baani somoio a•doko ILP-ko ra•gatna nangchongmotengani gimin agangrikangaha aro uamangko home minister, Delhi-ona okamate agangrikna ku•rachakaniko on•angahachim ineba Chief Minister parakataha.
Indake ong•engon, da•o dipet a•doko tom•tomanirangko nikna man•enga aro dingtang dingtang dolrangni jingjengatanirangko dakgenchimoba Meghalaya Police, kamko name jako ra•e ka•enga ine Chief Minister parakataha.
